RIP…一代球王胡國雄逝世！ 年青的朋友或者對這個名字感到陌生，然而筆者這一代80前的足球迷，胡國雄可以話係陪住我哋成長。筆者幾歲大就睇佢踼波，不過因為兒時筆者是南華Fans，對於精工冇乜好感，所以沒把他當偶像，不過就很佩服他的球技，尤其是代表香港出賽的時候，就坐在同一條船上，為他吶喊助威，當年519場波我都有份跳，有份叫！ 以前沒有Cable TV，沒有NOW TV…… 沒有英超、沒有西甲直播，作為球迷，就只有等待TVB每年直播的幾場大戰，真係唔知做乜鬼，每年真係得幾場波有得播，平時就只有收看星期日的球迷世界，才可以一睹胡國雄的風采。 冇得睇，聽都殺！

資源貧乏年代的娛樂

兒時筆者愛聽收音機的足球直播，在資源貧乏的年代這的確是一個不錯的娛樂，可以訓練自己的想像力，沒有畫面，阿叔、何鑑江等講波佬，描述很細緻，腦內就開始組織球場上的畫面，學習想像力，也學習描述事情的能力，而家好似冇咗囉。 曾經四奪足球先生，一代球王曾經很光輝。 退休之後，人生就開始走下坡。首先胡國雄有吸烟、酗酒的習慣，聽他的訪問說，飲得很凶！年青的時候就試過好幾次飲到入醫院，聽聞退休之後都冇戒過，成日飲醉。 醉醒了，就要繼續過生活。

胡國雄的理財啟發

關於胡國雄的生平，相信已經有很多報章大篇幅報導，筆者亦唔浪費墨水。反而想講吓關於理財的一點啟發。聽他的老闆黃創山先生訪問說，胡國雄一直沒有放下當年的光輝。據報導晚年的時候，他住在北角一個200呎的劏房，生活要身邊的朋友接濟，聽見都覺得好可惜！運動員生命很短暫，要為將來打算，其實以他的知名度，只要做番足球相關工作，例如搞足球學校，教小朋友踼波，或者好似而家好多球星咁，做教練，做講波佬，相信應該衣食無憂。 可惜他偏偏走去做生意，開體育用品店，開酒吧等等。 最後當然沒有成功，做生意是一門深奧的學問，唔係話退咗休，開間舖頭就可以的，如果我是胡國雄，肯定唔會一嚟就自己開舖，一定會找黃創山等老友打本，自己做個小股東，打埋工，邊學邊做。又或者先發展一些自己的優勢產業，例如足球學校等等。 如果覺得自己唔識做生意，不如買番幾層樓收租。 當年是80年代，中英聯合聲明之後，樓價應該平到不得了，記得當年西環一個兩房單位大約廿多萬而已。再唔係可以自己買舖，自己開酒吧，大不了做唔住咪租俾人囉。或者好多網友會話呢個諗法唔啱，但係人真係要為自己打算，未有穩定財政，做生意好鬼危險。1986年退休到今天已30年了，為甚麼選擇在酒醉中渡過呢？ 1% Anthony Fan Page《第一桶金》：www.facebook.com/anthony.wealth 圖：有線截圖

投票已截止，多謝支持