讀者來信： 你們好！我的先生曾經上過你們的裝修堂，內容很實用呢！謝謝你們的分享。聽說你們經常到大陸買建材及傢俬，比香港平很多，請問大概會平幾多呢？質量可靠嗎？買甚麼最抵？by Eva 覆讀者來信： 講真，筆者幾乎全屋的建材都是在大陸買的！ 質量方面，每個人的要求不同，鬼唔知意大利雲石靚過大陸地台磚咩？幾錢先得架？價錢相差十幾二十倍！我哋好清楚買樓唔係做人世，最多住幾年就搬，唔通真係好似電視節目訪問嗰啲咁，揼幾十萬落去裝修咩？收租單位更加唔使咁刁鑽啦，總之乾淨企理、靚仔有型，租客鍾意肯俾錢就得啦！買咩最抵？我覺得買燈最抵！這是其中一些買過的：

價錢平：大約為香港三分之一

以前唔識返大陸買，一個三房一廳的出租單位，花了五、六千元買燈，大廳買了一盞近兩千元的水晶燈，三間房燈每盞七、八百，加上廁所、廚房房及玄關等，五、六千元就花光。後來學會到深圳買燈，香港見到的嗰邊都有，先問問廳燈，四百！目定口呆，唔係啩？差咁遠？買晒全屋的燈，千幾元搞掂，兌港紙唔使兩千！

款色多：靈感有如泉湧

香港舖租貴、人工貴，燈飾店存貨不多，很多只會擺放最大路、鎖量最好的燈飾。大陸乜鬼都大過人，建材商場大到蕩失路，款色多到眼花瞭亂，就算你唔係室內設計師，上到去現場睇，無限靈感立即湧現！就好似以上的款式，左上角、左下角兩盞，羽毛燈、雀巢燈，是現時家裏用的款色，配上藍色、灰色、白色，感覺就很大自然。又例如右上角的和風簡約、中間皇冠款色的歐陸貴族氣派......數之不盡，全部五舊水樓下，房燈一百幾十都有，真係「唔買都睇吓，師奶都變 Designer」。

質量：跟香港差不多

點解香港見到的款式，絕大部分在深圳都找得到？你慌香港的燈飾舖唔係向大陸訂貨咩？咪又係嗰啲！不過大陸買燈飾，有兩樣嘢要注意。第一，有些要用火牛的款色要試清楚，試過買過一盞的確比較容易壞。第二，要預裝工，一般裝修師傅都會多加一千幾百裝燈，當然，即使香港買都要俾裝工，師傅報價時記得叫佢包埋。 1% Anthony Fan Page《第一桶金》：www.facebook.com/anthony.wealth 圖：網絡圖片

投票已截止，多謝支持