有病！取締電車就可以解決中環塞車？！ 靠害！旅遊業已經唔係好掂，係咪想佢死快啲？ 節錄於 2015 年 8 月 19 《經濟日報》： 「退休政府規劃師薛國強早前向城規會建議取消中環至金鐘電車路軌，以改善中環交通擠塞問題，他於電台節目中表示，港鐵西港島綫通車已完全取代電車......他又表示，電車已經完成百多年的使命......若城規會通過取消中環至金鐘電車路軌，相信當局會與電車公司商討取消全線電車......」 呢位阿叔，你就真係完成歷史任務啦，返屋企煲劇啦！

去電車論引起公憤

不過，筆者不排除呢位大叔因為退休之後創立了顧問公司，想免費幫自己做宣傳，於是就想出這一招，借「去電車論」引起公憤，令到自己成為全城熱話，如果係咁就真係成功啦！而家全港市民都認識呢位退休規劃師，亦有機會因此接到好多生意。 筆者在港島西長大，自小就離不開電車。 老爸是一位職業電車司機，開電車開了幾十年，養活我們一家五口。雖然老爸已退休多年，筆者亦已搬到九龍，甚少搭電車，但仍然對電車很有感情，相信很多港島人，只要跟筆者一樣，有番咁上下年紀，都與電車一起成長，都會撐電車！ 首先，中環塞車係最主要原因係乜呢？ 行多兩轉就知，主要係因為太多私家車、貨車，佔用、停泊於路面，朝早10點之後就已經Double Park、Triple Park！冇咗電車只會令這些私家車、貨車更放任，點解決塞車問題？ 其次，港鐵係咪真係可以完全取代電車呢？

電車最平最環保

電車是最平、最環保的交通工具，對長者來說，非常方便，港鐵？以西營盤站、香港大學站為例，由地面行到月台要 10 分鐘！行到上環啦！叫公公婆婆日日行上行落？就算佢哋肯行，行到落月台，時間已經相等於行路出上環了。 第三，最重要！電車是旅遊業的重要標誌！ 遊北京要到長城故宮，遊倫敦要到白金漢宮，外國人來旅遊，就只會到大型商場嗎？只會到人造景點嗎？電車已經有百多年歷史，是重要的旅遊資產，個個國家都識保育，點解呢位專家咁白癡？ 正如舊樓、唐樓，唔一定要拆！ 很多舊樓經過復修、翻新、活化之後，價值一樣可以提升，外國人就最喜歡香港情懷，中上環的唐樓，有型有格，租金分分鐘貴過高樓大廈，在我們的周邊，很多地方例如澳門的保育工作做得挺好，偏偏香港人自己不珍惜，旅遊業肯定死得仲快。 1% Anthony Fan Page《第一桶金》：www.facebook.com/anthony.wealth 圖：昵圖網： http://www.nipic.com

投票已截止，多謝支持