踏上這無盡旅途... 對大部分人來講，一踏入社會做事就係「踏上這無盡旅途」的不歸路... 有無人好憎自己份工，但為咗生活又對老闆敢怒不敢言？有無人收入很好，但為份工忙到完全不能分身，甚麼理想都磨滅了？有無人已過厭了日復一日刻板的工作及生活，但又想不到方法脫離無盡的輪迴？ 你的時間不屬於你自己，你要付出時間換取生存的權利。 邊個係財務自由人？ 以上是否就是你的命運？如果你是以上打工一族的一份子，財務自由相信是你們的夢想。但甚麼是財務自由，可能唔係太多人能夠清楚回答。簡單問一個問題考下大家，請各位3分鐘內找答案：以下邊一位人士已經財務自由呢？ A 現金50萬，打工月入$35000，每月儲$8000，居所租金每月$11000，每月銷售公司被動收入$7000。 B 現金5萬，打工月入$25000，近期股災撈底炒股已套現賺咗100萬，自住物業已供滿，每月儲$5000。 C 現金500萬，打工月入$125000，月儲$30000，居所每月交租$25000，兩層收租樓每月共收租金$35000。 D 現金10萬，打工月入$23000，月儲$15000，與家人同住每月家用$3000，每月銷售公司被動收入$6000，一層收租樓每月收租$10000。 註：所有收入均為稅後並假設各人生活方式不變。 OK，夠鐘！知道答案未？未嘅話，睇埋下面再諗下。 財務自由 財務自由是指你無需為生活開銷而為錢工作的狀態。講俗d，即係炒老細都無問題，月月自動有錢收又夠洗。「老鼠圈」這名詞就是指與財務自由相反的狀態，為生活不得不打工，然後身處週而復始的輪迴中度過餘生。 財務自由，主旨就是贖回自己的時間。 數字化來看，財務自由條件如下： 每月被動收入>每月生活開支 被動收入 被動收入，來來去去得幾種，租金、股息、版稅、網絡銷售佣金等等，睇你發展邊一瓣。此乃現金流。正如我上幾篇文所講，你比咗幾多理由呢個社會比錢你呢？你又有否發掘呢？ 生活開支 一般人基本生活開支最大部分係住屋，每月萬零蚊，其他都係一萬，總共$25000左右。講真，如果你一個月搵8萬洗10萬，你仍然需要為錢工作。節制開支對於財務自由的重要性，不言而喻。 買樓收租是為了逃離「輪迴」 以往有班人咁鍾情買樓收租，皆因過去5-10年買樓收租供埋樓仲有$3000-5000 正現金流。每層樓正現金流$4000，租金收入仲可以按通脹增長。買到第3-4層樓，加租2-3次每次10%，已經可以達致財務自由了。可惜，現時買樓收租在低槓桿環境之下需要大筆首期，未必再係一般市民的選擇了。那麼，時至今日，要逃離輪迴還有何出路？有緣再分享。 給你一個夢 今日先給各位朋友一個夢，大家在財務自由路上互勉，至少做到敢於夢想。要敢想，才能實現！ 後記：上題的答案：D。唔明自己諗下點解，或者對你踏上財務自由之路有所啟發。 圖：網絡圖片