上集為大家簡介左日劇海女嘅背景，今日就一齊黎行下久慈喇。久慈係呢個市嘅中心，所以呢度有街市，有超市，火車同巴士總站都全部喺晒呢度。一如平時嘅鄉下建設，所有建築物都係圍繞住火車站黎興建的。所以我地由久慈站呢度開始周圍行下。
以上就係久慈站喇，除左可以買車飛之外，大家見到呢度仲有紀念品買，車站亦都貼左劇中飾演兩位車站職員嘅相片。（杉本哲太同荒川良良大家應該好熟悉啦）
呢個巴士總站，有長途巴士直達東京市、盛岡同埋二戶。稍後嘅文章會詳細教大家點黎久慈呢度，大家可以放心。而JR久慈站就係八戶線嘅總站，另一邊總站就係JR八戶站，JR八戶站係東北新幹線嘅其中一個分站，所以去到JR八戶站時可以轉新幹線去北海道或者東京、大阪等地。
雖然呢間鋪個名叫水族館，但係入面有一層係放左好多日劇《海女》用過嘅戲服同埋用具，當中連劇中嘅火車站場景都搬左入黎呢度。加上呢間水族館係免費入場的，所以呢度係遊覽久慈必去嘅景點。
呢間鋪一睇就知係專賣日劇《海女》嘅紀念品架喇。呢度仲展出左好多劇入面用過嘅道具，包括上面呢個劇中久慈地型模型。見到實物嘅呢一刻，真係好感動呀！
今集又講住咁多先，下星期日我會帶大家去久慈飲飲食食。唔好錯過喇。
圖：由作者提供
投票已截止，多謝支持
返回
