終於開始我地墾丁篇既第一集，恒春喇。不過喺開始講恒春之前我想同大家介紹一個由當地人整既旅遊網站先，就係悠遊墾丁了（http://www.uukt.idv.tw）。悠遊墾丁最重要既地方，就係網主好用心咁整左個地圖，將墾丁細分左做幾個部分咁去介紹。佢個地圖仲詳細到連墾丁既百幾間民宿、食肆同海角七號既景點都一一列晒出嚟。去墾丁既朋友，記得去悠遊墾丁個網度print番張地圖出嚟傍身呀！
從上面呢張地圖中，你就可以睇到墾丁半島就係咁既樣架喇。而今集就係講中間靠左的恒春鎮。在恒春的最左手邊近海的地方就係海生館，再落少少既就會見到貓鼻頭同後壁湖。再睇番恒春鎮既右手邊少少既地方，就係今集會介紹既出火了。而地圖入面，地方同地方之間既數字就係距離，1即係1公里咁解，方便大家估算所需時間同埋方便租車既朋友知道要用幾多油同電。準備好就出發喇！
上次墾丁簡介都講過，恒春係一個古城，所以同樣有條好多嘢食，好多嘢買既老街，另外當然唔少得有警署（公安局），而警署旁邊就係恒春公車站。所有長途巴士都會喺呢度停站的。即是話你想返高雄都可以喺呢度搭車。
恒春老街即係地圖（http://www.uukt.idv.tw/_tw/_html_map/map_00_2.html）入面西門嗰條街，亦即係中山路，唔係好長啫，由頭行到尾半個頭就行晒。
講番恒春最出名既野食，就係上面呢碗叫做綠豆蒜既東西。感覺上似食緊凍綠豆加涼粉既感覺，中間果座山係冰來的。夏天食一流，甜味小吃，NT$30一碗。 當地人話，最正宗嗰間就係喺老街中間，有一間叫做阿伯綠豆饌既鋪頭旁邊，幫襯阿婆綠豆蒜喎。有咩分別我就真係唔知喇，因為筆者去既當日，阿婆同阿伯都無開門。咁究竟阿婆同阿伯係咪認識呢？定係打對台既呢？對不起，等你親自去一問究竟了。
出火有咩咁出名？顧名思義，呢度有火出咁解。聞說呢度既泥岩層特別多，咁地底既天然氣就透過呢啲岩層既裂縫中滲出黎，就產生火了。（不過我話你知，今時今日，其實地底係鋪晒煤氣管，造出嚟比你玩的。無法啦，邊有咁多天然氣吖！）
去出火玩有幾點要注意，由於白天去你跟本睇唔到有火（如上圖），你只係見到有圍欄欄住左入面一埋沙既東西。其實入面不斷有火噴出嚟的。千萬要小心，不過唔係好大火，唔會太熱。陣間夜晚既相你就見到個個衝晒入去玩架喇。不過咁，筆者希望大家喺白天時花幾分鐘時間過一過去，行個圈打探下個環境先，因為夜晚呢度係無街燈的。係乜都睇唔到架！！！所以同樣地，去出火記得帶電筒，原因同上。清楚晒之後，玩火喇喂！
睇下，夜晚就係咁架喇，個個拎住煙花行入去點火。跟住就搵個阻唔到人既靚位，用慢快門寫字（你唔係唔識下化？）煙花唔需要買定，出火公園門口既停車場有小販售賣多種煙花，手持既又有，大大支飛上天既都有。唔會太貴的，幾十蚊台幣有交易，不過玩時玩，最緊要安全。特別係現今既香港人好多都未接觸過煙花。唔識玩，唔知點著咗之後有咩會噴出黎，問清楚當地人先。
圖：由作者提供，部分相片取材自悠遊墾丁網站。
投票已截止，多謝支持
返回
