一連三個星期日帶大家玩盡台場，今日喺出發去日光之前，寫篇短少少既比大家睇下先。就係餃子之都宇都宮喇！宇都宮最出名就係餃子，如果你有JR PASS的話，不妨花50分鐘車程由東京搭新幹線過黎宇都宮試下餃子啦！ 由於筆者嚟呢度既目的都只係為咗一嘗地道餃子既滋味，所以今集只會介紹宇都宮站周邊，唔會去睇寺院等景點。我地又睇下地圖先： 無論你係由東京搭新幹線過嚟，定係由日光搭JR日光線過嚟都好。同樣係喺呢個JR宇都宮站落車，左手邊就係西口，右手邊就係東口，好易明。而好似香港大排檔咁樣既餃子廣場位於東口。不過唔好心急住，我地去西口行下街先。 宇都宮真係周圍都見到餃子，而位於JR宇都宮西口正對面，大家會見到上圖呢座有兩隻眼既建築物，呢座就係Yodobashi喇！筆者好鍾意行Yodobashi，雖然日本好多地方都有，但係入面又大又多店鋪。特別係玩具同電器既樓層，一層一個分類，香港幾大間既電器鋪都比唔上。 行完街，天都黑齊，去食餃子喇。行過去東口有條行人天橋，天橋上面望落去‧‧‧ 係咪好似去咗香港屋村既大排檔咁呢？呢個餃子廣場有好多間食肆，其中有幾間好似係一樣的。而筆者求其揀咗一間去食，如下圖： 今次筆者去咗健太餃子，呢度最大賣點係上面呢款一碟12隻不同味道既餃子，味道喺上面張圖就見到，真係食餃子都食到飽，但係呢12隻都只係￥840 （即係港幣52蚊），抵呢！ 想知更多餃子既資訊，可以去宇都宮餃子會網頁。呢度有全個宇都宮既餃子店介紹。非常詳盡！ 食完之後，唔好咁心急走住，行下JR宇都宮站大堂先啦。 呢度有間賣半熟芝士撻的店鋪，超好食！！好食過香港依家日日排長龍嗰間。呢度一隻撻賣￥230（即係港幣14蚊）唔算貴啦。買番盒6隻（只需￥1300）上新幹線食，又好味又可以打發時間，約50分鐘就返到東京。有JR PASS既朋友，不妨花三四個鐘上黎宇都宮行下食下餃子。好過喺東京同人迫吖！ 最後同大家睇下JR宇都宮站既月台： 下星期，我地真係要出發去日光喇，第一站係有忍者村之稱既日光江戶村。下星期日見！ 圖：作者提供