今日去遠少少，帶大家去近年好多香港人去既輕井澤。由東京搭新幹線過黎約一小時十分鐘車程。（搭得新幹線當然要買ＰＡＳＳ，否則單程車費已經要５３９０円）另外提提大家，輕井澤呢度係高原地區，亦係日本人既避暑山莊，所以就算東京幾熱都好，黎到呢度都總會覺得陣陣涼，記得帶定件風褸黎。
輕井澤有日本小瑞士之稱，呢度既賣點就係歐陸式既建築物、樹木同瀑布。搭左成個鐘頭新幹線，一落車，呢個站得兩個出口（南口同北口），南口基本上只係去OUTLET（王子購物廣場）；而北口就係去景點的，例如：銀座大街、聖保羅教堂、雲場池同白絲瀑布。依傢我地去南口行下OUTLET先。
王子購物廣場
呢度真係大到無人有，中間大大個草地係容許遊客上去踩下坐下的。不過由於當日超大雨，所以大家見唔到有人。一如日本既OUTLET MALL，呢度咩牌子都有，價錢都算平。好多人專登黎輕井澤行呢個OUTLET的。
舊輕井澤
離開王子購物廣場之後，穿過火車站，去番北口方面。
一出火車站，只要沿住呢條輕井沢本通り就可以去到上面講過既景點，當然啦，行就比較遠，踩單車係最好的。
可惜既係，筆者去既當日係超大雨，單車鋪都無開。
唔想用腳踩既話，呢度都有台灣長者輪椅式既電動車。４小時１５００円。
從上面地圖可以見到，只要沿住輕井澤站北口（即係上文介紹過既輕井沢本通り）一路行就可以去到聖保羅教堂（附近有街行架），再北上最遠就可以去到白絲瀑布。如果唔想行既話，可以由輕井澤站北口既巴士站搭巴士直達白絲瀑布，車費為710円，車程約２３分鐘）。踩單車既話慢慢邊踩邊睇，花半天時間岩岩好，留番半天行OUTLET，咁就可以一次過滿足晒兩個願望。
除左以上幾個景點之外，喺輕井澤站既北口有個遊客服務中心，入面有好多小冊子介紹輕井澤的，仲有好多特別既景點位於中輕井澤站附近，例如セゾン現代美術館，如果大家有時間既話，可以搭一個站火車去中輕井澤站行下。
講左咁耐，點解仲未有相睇既呢？對不起，由於當日實在太大雨。唔係講笑的，2015年9月日本關東水災呀！大家見到上面既相已經係萬幸，否則單車鋪都唔會關門大吉。雖然好可惜，不過咁有特式既地方就留待大家開發啦。
出唔到去，唯有留番喺火車站入面行下。
信州有兩大特產，一樣係味噌，另一樣係釡（好似砵仔飯既東西）上圖可以見到，好人買架喎，大家可以試下。
最後比埋個新幹線時間表比大家，約一小時有一班車直達東京，行OUTLET之前，去JR客務中心劃定回程既位先就穩陣喇。
下一集，會帶大家去當時水災最嚴重既栃木縣行下鬼怒川、日光同埋宇都宮。下星期見。
註：圖由作者提供，地圖取材自谷歌地圖，水災相片轉載自日本電視新聞截圖
投票已截止，多謝支持
返回
