本港新冠疫情嚴峻，確診人數每日新增數萬，至今未見止息之勢，早前更有報道指，本港3月9 日嘅單日死亡人數佔人口比例為全球最高，每百萬人口中有約38.5宗死亡個案，一度「超英趕美」。病毒傳播嘅情況，固然係令人擔憂，而港府應對疫情嘅種種甩漏，更令唔少小市民心生疑問：到底香港人做錯咗啲乜嘢，要受到如此對待？

年初國泰機組人員涉嫌利用漏洞入境，將變種病毒Omicron帶到香港，當時有議員喺答問會上質詢特首林鄭月娥，會否就事件向公眾道歉，特首強調「不接受政府抗疫不力批評」，更話會追究違規行為到底。

本地醫療系統瀕臨崩潰，公立醫院床位供不應求，老弱婦孺被迫冒住寒風，喺急症室外嘅帳篷候診，引起社會嘩然，有人即使有病徵或者快速測試呈陽性反應，都未必敢去醫院排隊，寧願留喺屋企自我隔離。特首隨即割席表明「不能接受」，並責成各部門及醫管局解決。

揭示政府抗疫不力

院舍爆疫無人問津、確診者求助無門、打工仔遲遲拎唔到「隔離令」、有人將近康復才獲安排隔離、也有人符合標準卻仍被隔離，還有許多種種，都揭示著政府抗疫不力及部門之間嘅不協調。

每日疫情記招之上，當遇到質疑政策有問題，是否執行不力嘅時候，市民總會聽到一大堆似是而非嘅理由。昨日仲同你講緊「動態清零」，今日就話爭論呢點已經毫無意義；被批評「朝令夕改」，就話大家「見仁見智」啦！如此「刀槍不入」，認真係「好打得」。

既自稱「抗疫主帥」，理應負責統領三軍，運籌帷幄，但當真係出事嘅時候，千錯萬錯，似乎都係部門決策嘅錯、係前線執行嘅錯、係市民唔配合嘅錯。總之，就唔係「主帥」嘅錯，咁最錯嘅，到底係邊個？疫戰當前，唔係話想追究邊個嘅責任，但香港人都唔係傻嘅，又何苦繼續愚弄市民呢……

原圖：星島日報

https://std.stheadline.com/realtime/article/1809682/