內地官媒披露，解放軍殲-16戰機上年喺近海巡航時，遇到兩架外國隱形戰機高速撲近，疑似想以「低可探測姿態」窺探我國門戶。結果我國戰機機師即場炫技，一個桶滾，直接喺對方頭頂倒飛，兩機座艙蓋最近得十幾米；更誇張係，殲-16同時鎖定兩架對手，意思係如果真開火，對面機師即刻就可以測試彈射功能仲work唔work。之後人哋亦都好識做，為免「落地成匣」，急急腳調頭走。坊間有猜測嗰兩部可能係美製F-22或者F-35，不過無論係咩機型都好，重點係，夠膽嚟挑釁中國嘅，最後都一定會係被送走嘅嗰個。

講到呢幕「頭頂頭」飛行，不少網民即刻聯想到電影《壯志凌雲》(Top Gun)入面，阿湯哥揸住架F-14戰機戲弄蘇聯戰機嗰一幕。估唔到今時今日竟然喺現實上演。要知道《壯志凌雲》被稱為美國空軍最強宣傳片，1986年第一集、2022年續集，都成功水咗唔少美國年輕人參軍。場景一模一樣，但角色已經完全互換——今次輪到美製戰機被人戲弄。

有人可能會問：而家打空戰，遠距離一發「霹靂-15」飛過去就搞掂，咁樣show技術有咩實際意義？老實講，呢招更多係「震懾」，近距離展示我方對局勢嘅把握、中國戰機機師嘅膽識同技術。對手見識過之後，識做嘅就離場；唔識做嘅，就你諗你喇！而且，敢喺高風險環境保持精細操控，背後正正係對我國裝備、信息支援、後方協同嘅高度自信。

何況殲-16不過係我國第4.5代戰機，F-22同F-35都係美國第5代，而且仲係隱形戰機。點解會畀中方咁輕易發現？又點解會畀「舊一代」嘅殲-16輕鬆埋身，甚至咬實做到「頭頂頭」飛行？當中意味住乜，相信唔使我多講。

所以，殲-16今次點止「倒轉飛行」咁簡單？佢倒轉嘅，仲有好多人對美西方「無敵空軍」嘅幻想。美國想再拍《壯志凌雲3》？大可以換殲-16做主角，酬勞再講，票房一定有保證。

（文章純屬作者個人意見，不代表本報立場。）