教育局局長楊潤雄不久前表示，近年社會出現種種歪風，令部分年輕人受影響而耽於逸樂、誤信失實資訊而走歪路等；佢特別提到近期興起嘅「躺平主義」，令佢感痛心和憂慮，因此須加強價值觀教育。

「躺平主義」先在內地興起，要言之，就係乜嘢都唔想做，「與其努力，不如躺平」，明顯係一種消極狀態，「阿姨，我不想努力了！」用廣東話表示，即係「好食懶飛」；年輕人沒有上進心，只求「躺平」，乜都唔使做，飯來張口，醉生夢死。

據楊局長係其「局中人語」舉例指出，年輕人沉迷網絡遊戲、在互聯網散播虛假、誤導和煽動仇恨訊息、不良的性資訊和引誘等，令一些青年人受影響而耽於逸樂。

要令年輕人積極向上，是否加強價值觀教育就掂？

有專家就話，唔少年青人對前路感迷惘，大學畢業收入與學歷不成正比，就算透過培養學生積極正面嘅心態，若然多次碰灰，心態上積極都變消極。

筆者覺得，當今青少年係身在福中不知福！有機會免費受教育都唔珍惜。自黑暴以來，成四千學生被捕，就知本港教育千瘡百孔，由小學到大專都失敗！學校嘅傳統教育：「德智體群美」五育可謂蕩然不存！事實上，教育嘅普及反而衍生大量問題，唔少教師亦不再「傳道授業解惑」，而係無視教育嘅初心：教學生堂堂正正做好一個「人」！反而教導學生走歪路，加上社會邪風崛起，連「暴力或許可以解決問題」、「坐監令人生更精彩」嘅話都講得出，講呢啲屁話嘅仲要係社會「有頭有臉」嘅名人！

近排香港暴力事件仍然層出不窮，豈是無因？不久前有黑衣男，暴力推女子落輕鐵路軌；有為爭泊位而涉嫌「打死人」、兩女子在地鐵車廂因講手電太嘈而扭打起來等！阿哥，即使柏楊名著《醜陋的中國人》不再發行，你估港人醜陋嘅行為就會自動消失咩？

講真，若然港人或年輕人愛上「躺平」，社會出現大堆廢人，各位，佢哋即使唔想努力，都係自己生活嘅「風格」，起碼不至於危害社會！是以筆者認為不必強調甚麼價值觀教育，而係返去教育嘅初心：教佢哋做一個「人」更重要。人者，仁也。

國學大師錢穆引孟子的話：我得志，不為也。錢穆說，世人之為與不為，皆由外面條件限制決定，非我自欲為或自不欲為。佢進一步說，其心有仁則知恥，知恥則寡欲。其心知恥寡欲則自知義；故義亦起於內心，必隨仁而起。

嗱！當今之世，教育失敗，就係未能培養學生嘅心有仁，心中冇仁，自然不知恥為何物，錯咗仍不知悔改！危害社會、做漢奸都理曲氣壯，你仲同佢講乜鬼「價值觀」吖！

原圖：點新聞、星島日報
https://www.dotdotnews.com/a/202109/08/AP6138c1e5e4b08e6c889b016d.html
https://std.stheadline.com/daily/article/2390080/