自2018年12月1日慘遭美加設局拘捕，華為副董事長孟晚舟受困加拿大將近3年，同年邁嘅父親，華為創辦人任正非分隔千里。近日有報道就話，美國司法部想同孟晚舟代表律師商討認罪協議，要求孟晚舟認罪兼賠鉅款，美國就會終止對佢嘅引渡申請同撤銷刑事訴訟，等孟晚舟可以返回中國。

雖然美國司法部同華為都未有就相關消息作出任何回應，不過空穴來風就梗係有啲嘢㗎啦！果不其然，馬上就傳來孟晚舟即時獲釋嘅好消息，據《新華社》報道，孟晚舟已隨即搭上中國政府安排嘅航機，以民族英雄嘅姿勢準備凱旋回國！

其實早喺2020年12月時，美媒《華爾街日報》已經報道過，美方曾提出類似條件，以「自由」為誘餌，要求孟晚舟承認部份控罪。而孟晚舟其後亦透過代表律師強硬回應，表明唔會接受私下調停，更強調如果美方唔滿足「無條件釋放」、「公開道歉」、「賠償」三大要求，佢寧願坐穿美加牢底，亦絕不屈服！

獲延期起訴協議

咁依家孟晚舟可安然回國，係咪代表佢向美國屈服？當然唔係！據最新報道引述檢察官凱斯勒（David Kessler）表示，孟晚舟獲「延期起訴協議」

（Deferred-Prosecution Agreement，DPA），只要孟晚舟喺2022年12月之前並無違法，就可獲撤銷控罪。與此同時，孟晚舟仍然堅持否認控罪，喺大原則之上，絕無向霸權妥協嘅餘地，從政治角度去睇成件事，今次好明顯係美帝霸權再一次慘敗！

其實當日指使小弟加拿大強行拘捕孟晚舟嘅美國，又點會唔知自己理虧？經歷過一場世紀疫情，睇見中國迅速恢復，自己就日暮途窮，又點會唔驚到腳震？所以美國後悔當日所為，依家當然要搵番個下台階，正所以就算輸，都要輸得好好睇睇啊嘛！而孟晚舟不但依舊穩站喺道德高地之上，亦可藉此良機重獲自由，同老父任正非團圓，依家可以話係最圓滿嘅結果。

孟晚舟巾幗不讓鬚眉，喺加拿大與霸權周旋千日而不屈，絕對係我哋14億中國人嘅驕傲！孟女士作為中華兒女所展現出嘅風骨，己足以載入史冊，成為後世炎黃子孫嘅典範！一齊畀Like歡迎晚舟歸航，向我們的民族女兒致敬！

原圖：新華社