香港賽馬會喺本月2號發出通告，指已終止14名人士嘅會籍，即時生效，名單包括黎智英、李柱銘及何俊仁。當中重犯黎智英多案纏身，其中包括涉嫌違反國安法中勾結外國勢力罪，最高可囚終身。
阿哥，馬會會籍係人都知係「身份象徵」，即使你大把身家，都唔係咁易申請得到會籍！之不過，對於身陷囹圄，忙於洗廁所嘅黎智英，失馬會會籍睇怕冇乜感受！講真，依家畀個皇帝佢做，佢都冇感覺啦！壹傳媒都畀保安局連根拔起，呢個反中亂港集團將喺香港徹底消失，落得個白茫茫大地真乾淨！
黎智英之所以落得今日咁嘅田地，倒應了「自作孽不可活」呢句說話，亦如筆者之前所強調：人無善志，雖勇必瓜！今黎智英眼前無路想縮手，一切都已經太遲了。
行文至此，想起最近熱話就係保安局局長鄧炳強已化身「死亡判官」，皆因好多黃絲組織、反中亂港集團，一經鄧局長「品題」，不須幾日，不是匆忙解散，就係自我了斷，真係靈過黃大仙吖！
呢，由蘋果日報、民陣、石牆花無不自我解散，最近鄧炳強局長則批評記協違專業，滲透校園，拉攏「學生記者」入會，有13歳學生或未受過訓練嘅亦係「記者」，質疑記協掛羊頭賣狗肉。筆者相信，一經鄧局長品題，記協唔自我解散，都會「近來學得烏龜法，得縮頭時且縮頭」。
最好笑就係由前議員邵家臻發起，所謂嘅支援在囚人士組織「石牆花」，個名起得幾有勢，石牆開出花，畀人感覺堅強不屈、求生力野蠻，即使風吹雨打都冇有怕！誰不知畀保安局局長鄧炳強點名批評後，冇幾耐旋即宣布解散。筆者喺螢幕見到邵家臻哭喪着臉，男人老狗眼含淚珠，口窒窒話喺目前嘅政治環境下「保住條命最緊要」，真係笑死！
阿哥，好心咪叫「石牆花」吖！叫「牆邊草」都配不上，牆邊草仲識兩邊倒！依家風雨未至，已經自我凋萎，叫乜鬼「石牆花」吖，叫「石殘花」庶幾近之！
原圖：星島日報
投票已截止，多謝支持
返回
