執筆之時，正係蘋果Last day，筆者都忍唔住開返支香檳慶祝，但就硬係覺得爭咁啲嘢，如果可以切多條臘腸嚟食，咁就真係完美喇！唔知各位香港人又有冇同感呢？

有黃友就話，蘋果收檔代表香港新聞自由已死云云，當然呢個只不過係佢哋自欺欺人、圍爐取暖嘅論點，根本完全站不住腳。其實香港不嬲都好尊重言論同新聞自由，只不過有一啲別有用心嘅人，借住所謂「自由」作幌子，行反中亂港之事，如今氣數已盡，亦係理所當然！

香港有冇新聞自由？譬如《東方日報》就經常會發表一啲批評政府政策或者官員嘅文章，但同時亦都會提出一啲非常有建設性嘅發展藍圖；又譬如何柱國仍執掌《星島日報》嘅時候，亦成日會公開發表一啲批評政府嘅言論，繼而提出唔少發人深省嘅意見，希望政府改進。上述兩個例子其實都有一個共通點，就係想香港好咁簡單。所以今日要摺埋嘅，係蘋果日報，而唔係其他報章囉！

話返轉頭，香港有問題嘅傳媒又豈止《蘋果日報》一家，據報早前警方國安處喺搜查《蘋果日報》副社長陳沛敏住所時，就帶走咗幾部懷疑屬於其丈夫、《立場新聞》總編輯鍾沛權嘅電腦，到底蘋果之後，下個到邊個？香港人大可以拭目以待。食完蘋果，再切臘腸，一甜一鹹，豈不妙哉？！

原圖：星島日報

https://std.stheadline.com/realtime/article/1601204/