社區有需要,就梗係搵區議員幫手,就好似最近佐敦寶發大廈嘅外牆,有一片不明污跡,街坊就怕係屎渠慘漏,喺新冠肺炎爆發嘅日子,都咪話唔驚!但係當街坊搵佐敦南區議員陳梓維求助時,陳議員竟然畀咗一個意想不到嘅回覆!
陳梓維喺Facebook發文:「由於管理處話唔會通知法團,而又我咁啱冇該法團電話,所以我用咗一種無人會用方法,就係通知我對家(去處理)!」佢喺帖文貼咗一張上年寶發大廈業主立案法團嘅管委會會議紀錄,上面清清楚楚列出「民建聯葉傲冬」同葉嘅電話號碼,相信陳梓維要搵嘅對家,就係葉傲冬。
有網民就似乎不齒陳梓維嘅做法,直斥:「咁我下次投票畀對家得啦!」有啲網民就比較平心靜氣,教佢:「你會唔會主動小小去搵民政事務署嘅電話,再同相關政府部門聯絡好啲呢?」
原來做嘢嘅意思,就係搵對家幫手做嘢,陳梓維都幾好嘢喎,印印腳有糧出,搞唔掂就卸畀人。不過,大家唔好誤會呀,陳梓維好似好負責任㗎,為防對家將工作當為自己功勞,所以陳梓維在Facebook立此存照,聲稱兩星期後再巡視寶發大廈,「如果(對家)並未清潔或通知法團,會進行下一步行動」喎。
下一步行動?唔通佢諗到搵出法團電話嘅方法?定係親身去清潔大廈?真係要拭目以待喇!
原圖:佐敦南區陳梓維議員辦事處Facebook圖片
https://www.facebook.com/chantszwai1124/photos/124277652326860
投票已截止,多謝支持