香港警務處同鳳凰衛視合拍紀錄片《暗夜星辰》上映超過一個禮拜，相信唔少人都已經睇咗，未睇嘅都唔使擔心，呢一篇並唔係影評，為免劇透我絕對唔會多講內容。

同大家平時去戲院睇開嘅大製作相比，老實講《暗夜星辰》拍得唔算精彩，分鏡剪接未臻完善，場面調度略欠火候，某啲位甚至會悶親觀眾，但偏偏佢就勝在夠真實，全無刻意煽情造作，竟然吸引我無限回帶，就算手頭上做緊其他嘢都好，唔睇畫面都要一定要播住聲，重複又重複咁細味一位位警員講述執法時嘅心路歷程。

喺過去年幾嘅暴亂中，絕大部份市民都只可以隔住個螢光幕，睇警察點樣同暴徒周旋，我哋雖然睇到執法有幾辛苦同凶險，但冇幾多人會明白執法者嘅內心掙扎。前線警員所面對嘅，雖然係一班全副武裝、窮兇極惡嘅暴徒，但佢哋亦心裡明白，暴徒面罩背後，不乏只有十幾歲嘅細路，呢班細路不過係受人蒙蔽當槍使。然而，守護社會安寧嘅職責所在，警員縱然係無可奈何，仍不得不揮動手中警棍，希望以最低武力拯救呢班誤入歧途嘅細路，令佢哋得以早日醒覺。

咁複雜嘅心理活動，如果唔係因為睇咗《暗夜星辰》，由親身經歷過嘅警員現身說法，香港市民大概一世都唔會理解，雖然，睇完都未必能夠理解，但至少可以知道，警察真係為我哋香港呢個屋企付出太多太多。

警匪片係香港影視最常見嘅題材之一，故事中嘅警察主角喺儆惡懲奸嘅時候，往往都威風八面，相信唔少人都曾經喺〈我的志願〉立志做警察，期待有朝一日伸張正義。人大咗，先發現原來警察學堂唔係話入就入，直至黑暴陰霾籠罩香港，見證執法者夙夜匪懈，更加明白做警察一啲都唔簡單，每一個動作都可能畀人渲染成「警暴」，而嗰班手執磚頭汽油彈嘅暴徒，原來係「義士」，電影與現實，真係差好遠。

《暗夜星辰》海報有句「別擔心，時間會證明一切(Don't Worry, Time Will Tell)」，一年過去，香港人，都應該同警察講返聲多謝。

原圖：《暗夜星辰》片段截圖