一連兩篇美國村既介紹完結，今日到交通指南了。由那霸市出發的話，可以搭單軌火車去旭橋站旁邊既那霸巴士總站搭28或29號巴士，約40分鐘車程。

由旭橋站出閘計，沿東口出，如下圖，就會見到上面個巴士總站。

巴士總站係三角形的，而我地要搭既係28或29號，所以要去8號月台等車。

影埋個時間表比大家睇（15年2月攝），班次算幾密，一個鐘都有三班車左右。

如果你住喺國際通附近的話，可以由分站上車，而最近國際通既分站就係県庁北口。之前介紹過幾次架喇。唔明就睇多次下面個街景地圖。

搭40分鐘左右就到，車費約￥710，記住係軍病院前站落，車內有落車提示的，加上好多人呢個站落車，唔駛擔心唔識落車。再唔放心既話，又係寫定紙仔軍病院前就可以，日文同中文完全一樣，如下圖。

為左方便解釋，又睇多一次美國村地圖，右手邊就係軍病院前站，如果你想去AEON的話，落左車之後向車尾方向經地標Ａ就會去到；如果你想去摩天輪嗰邊既話，落左巴士之後向車頭方向行，經地標Ｂ就會去到。相片如下：

（上圖為地標Ａ，下圖為地標Ｂ）

如果你係自駕遊的話，地標Ｂ旁邊就係免費大型停車場，所以你係應該過左軍病院前站先左轉的。

回程既話，行番出巴士站過對面馬路，搭相反方向往，搭任何一部既寫住那霸既巴士都可以，包括28、29同120號巴士。

順帶一提，如果你想繼續北上，即係去名護或者殘波岬之類既景點既話，你係可以從落車站，搭120號往名護既巴士北上的。所以同樣地，如果你住名護附近或西北部沿海地方的話，都可以搭120號巴士落黎美國村的，不過120號出名兜路，由名護落黎我諗要兩個鐘左右。

下一集，繼續帶大家遊沖繩，下次去首里城同埋帶大家食和菓子。

圖：由作者提供，地圖及街景地圖取材自谷歌地圖

投票已截止，多謝支持