上圖唔係QR Code，而係東京鐵路既路線圖。東京既鐵路網非常復雜，但係復雜既優點就係總有一個地鐵站喺附近。另外，亦都因為日本鐵路路線，就算同一條線都會有好多唔同既總站（就好似香港東鐵綫咁有分羅湖車同落馬洲車一樣）。 所以未去過日本，又或者本身對日本鐵路唔熟既朋友，就會睇到一舊雲。 日本既鐵路簡單可以分為 JR 同 私鐵 兩種。JR是日本鐵路集團經營，而私鐵其實是私有化鐵路既統稱，單單東京圈內計，已經有幾家私鐵公司，包括：都營、Metro、小田急電鐵、東急電鐵、西武等等。一般黎講，JR線係可以互相免費轉乘的，而私鐵線亦都可以各自互相轉乘。但係由於各私鐵既停站位置有差異既關係。部份車站係需要乘客先出閘，然後步行至另一家私鐵車站大堂再入閘的，就好似香港尖沙咀同尖東站既關係咁。所以上文提到，去得日本玩，記得買定張SUICA（人稱西瓜咭，即係日本既八達通）。咁樣轉車會方便好多。 另外，日本既鐵路亦都好似台灣既台鐵咁，分左好多種唔同速度既車次，包括有站站停既 「各停」，飛少少站既 「快速Rapid」，再飛多少少站既 「急行Express／通勤特急」，同埋唔停站咁滯既 「特急Limited Express」。要注意既係，JR同埋開往市郊既私鐵特急班次多數都係採用 「對號座」列車的，咁用得對號座咁爽當然要比貴啲錢，一般會比普通車車費貴多一倍。而市區內行走，採用普通地鐵列車行走既私鐵線特急車就無需加錢，當普通車咁搭就得架喇。所以喺日本搭地鐵有時真係唔駛急，搭下一班急行可能仲快過之前一班車去到目的地。「四字碼」 上面個時間表係一個例子，大部份車站都會有明確既時間表列出黎比大家睇的。日本既鐵路係實時的，幾點開就幾點開，唔似香港地鐵咁預唔到時間。而時間表唔同顏色既字代表唔同既班次。（例如紅色就係特急班次喇！） 另外，喺大部份JR同私鐵線既月台，都會有該路線列車停站既圖，你只需要留心睇每一個車站旁邊既 「點」，就可以知道邊種車次途經邊個車站。以上面為例，澀谷係四種車次都會停既站，而代官山站就只有 「各停」既班次會停。一般黎講，急行車飛得既站都係啲比較少人上落既車站，所以應該對各位旅遊人士影響不大既。 喺分開介紹JR同私鐵之前，我想同大家講，JR會比私鐵貴少少。但係由於JR轉車比較方便，亦都因為JR係喺地面／架空行走既關係，筆者同各大旅遊書一樣，比較推薦大家搭JR線遊日本。 JR East （JR東日本） http://www.jreast.co.jp/map/pdf/map_tokyo.pdf 各位可以經上面既連結下載JR東日本（即東京市）最新既路線圖旁下身。太花睇唔明既唔緊要，睇下面呢幅。 初次去東京既朋友，一般旅遊書都會介紹你搭JR山手線架喇（如上圖）。原因係JR山手線係一條環狀既路線，佢有分順時針同逆時針兩種班次行走，平時大家去日本既主要旅遊點都可以搭JR山手線去到，所以對初學者黎講絕對係一件美事。最多你搭錯車既話，浪費少少時間搭返轉頭又或者順住轉一圈，點都會去到目的地。而呢個圓形既中間有一條打橫既線叫做中央線（想飛站既就搭中央線快速啦），有左呢條中央線之後，由左去右或者由右去左都會快一半時間以上。日後既旅遊介紹筆者會寫明你點搭車架喇。我地又好簡單咁介紹東京市最常去既景點先，我會以上面個圓形，劃開四份黎講： 左上方：池袋、新宿 左下方：原宿、澀谷、惠比寿、目黑、自由之丘 右下方：新橋（轉車去台場的站）、築地（要搭私鐵先去到）、東京、東京迪士尼（東京站再轉車去舞濱站出） 右上方：秋葉原、上野、日暮里、淺草(要搭私鐵先去到) 咁樣劃分為四份黎記，係記容易好多呢？大家自己編行程時用以上四組地方黎編就可以好容易咁編到相連既地方架喇。 私鐵 http://www.kotsu.metro.tokyo.jp/ch_h/services/pdf/chinese_t.pdf 以上係私鐵線既路線圖，同樣地，記得出發前PRINT出黎旁下身。另外，由於要解釋私鐵線比較覆雜，所以日後大家睇筆者既旅遊介紹時，無得搭JR既地方我先會再教大家搭私鐵。一般黎講，淺草（即係雷門）、SkyTree、台場同埋築地都係要搭私鐵先去到的。

SUICA增值及退咭方法

SUICA同香港既八達通調番轉，八達通入閘時如果無錢佢就唔會比你入閘，一定要你增值左先。而日本既SUICA就方便好多，閘會照比你入，但係落車時唔夠錢就會唔比你出閘。呢個時候唔駛擔心，無論JR定私鐵，每個車站既出閘口附近都會有個大告示牌寫住 "精算機" 的。精算機其實就係增值機了，你唔識日文唔重要，你插張SUICA落去，佢會寫住你仲有幾錢剩，同埋呢一程車資係幾多。你可以選擇淨係支付呢一程車資既尾數又得，又或者可以以整數（即￥500、￥1000）咁去增值亦得。呢部機有得找贖的，放心。 提提各位，當你離開日本既時候，你可以去返機場JR既客戶服務中心，即係上集介紹過買NEX來回優惠嗰間鋪，比番張SUICA佢退返按金的，即係同香港退八達通情況一樣。你就咁拎住張SUICA行埋去佢已經知你想退咭架喇。不過有件事要先說明！如果你張咭入面仲有錢剩既話，退咭時剩番既錢係退唔足比你的， 因為要扣手續費！但係如果張咭入面無晒錢既話，咁就唔駛扣手續費喎。所以最理想既做法係，當你最後一日用SUICA既時候，多啲用黎買野飲，買野食，盡量用盡張咭佢。最後再用佢搭一程JR/私鐵，於精算機增值時淨係比該程車既尾數。就可以完全地用晒張咭既錢架喇。 直通運轉 今集最後想介紹一樣比較覆雜既野，睇得明就明，唔明既無所謂當無聽過。呢樣野就叫做 "直通運轉"。是咁的，因為日本有好多私鐵公司既關係，所以整左數十條路線出黎。表面上就好方便，但係如果我叫你搭幾個站就轉一次車既話你都咪話唔煩？所以日本政府就用左 "直通運轉" 既方式黎穿連住各路線。我以香港地鐵黎做例子，拿，原本東涌線既車去到東涌就係尾站，但係依傢政府要直通運轉，於是東涌線列車就會踩入機場快線既地盤再去機場同博覽館停站。 相對地，機場快線既列車喺博覽館／機場出發後，亦會踩入東涌線地盤停東涌站再出市區。大家可以見到，呢個好處係乘客唔需要轉車，一程過就可以去到目的地。至於啲錢點分就由兩間公司自己拆掂佢。亦都因為咁，大家喺日本搭私鐵時好多時都會見到同一條路線有幾間唔同公司既列車行走。這是正常的事！上面張POSTER，就介紹左當年四月開始，有新既直通運轉路線，乘客可以由新宿三丁目，經澀谷直達橫濱！以前要喺澀谷站落車出閘之後再轉車架！所以有直通運轉方面好多！ 圖：由作者提供，部份相片轉載自林氏璧和美狐團三狐的小天地，路線圖轉載自JR東日本以及都營地下鐵官方網頁

投票已截止，多謝支持