終於嚟到高雄篇既最後一區──鹽埕區。今集先會講吓鹽埕埔，之後會再講西子灣，最後講埋旗津之後，整個高雄篇就完結。 一般嚟講，鹽埕埔同西子灣，甚至係旗津係應該黐住一齊去的。睇左下面既地圖先： 大家可以睇到，其實鹽埕埔同西子灣站的確係好近，步行約15-20分鐘就會行到 （我諗銅鑼灣行去灣仔咁上下啦）。而西子灣站既再左手邊就係搭船去旗津既碼頭，我地下次先會詳細講。好多人都會問究竟呢個地方值唔值得去？旅遊書講到呢度好似好多嘢睇咁，但係你一出捷運站又好似比人呃咗咁，周圍都係住宅，仲要係好舊既舊區嚟添。 今日我簡單咁答你，如果你想去歷史博物館、藝術區、鐵路博物館（西子灣篇時先會講到）或者真愛碼頭既話，你咪去囉，否則呢個地方的確係可以Skip。 好喇，睇番上面地圖既紅字，大家可以大約知道不同景點既位置。由鹽埕埔站行去博物館同藝術區時間大約係5-10分鐘。而著名手信鋪瑪莉食品就位於五福四路近高雄橋既位置，買完經天橋行去國賓大飯店都唔係好遠。而真愛碼頭就真係遠啲，但係為咗浪漫同影相既你應該唔介意既。好喇，入詳細正文。 郭家肉粽 我地由地圖既上面開始講起，先介紹一間高雄好出名既地道小食比大家，叫郭家肉粽。地址係北斗街17號地下，即北斗街同新興街交界。地道嘢當然唔就腳，距離地鐵站都幾遠，大家有心試先嚟啦。（我都係因為一位高雄朋友開車車我嚟，我先識食）。 當你去到上面第一張相「吃懷念」就即係搵啱地方喇，吃懷念旁邊嗰間就係郭家肉粽。個粽其實同香港大家平時食既粽無乜大分別。但係佢出名既地方反而係個汁。上圖大家會見到啡色既汁就係喇，汁唔辣，但係我又寫唔出係咩味。無論你叫飯也好，粽也好，就算係豆腐花，都會淋上呢種特式醬汁。睇埋佢既古老裝修，都係幾十蚊新台幣一碗。抵喇掛？

高雄紅茶入口甘香

食完之後，行出門口就會有一間飲品檔，嚟得高雄當然唔少得筆者極度喜愛既「古早味紅茶」啦，又係幾十蚊大大杯。高雄既紅茶同台北、甚至香港珍珠奶茶鋪買到既係完全兩回事，高雄紅茶係用古早既方式製造，用咗一啲我都唔知係咩既茶葉整成，入口係有一種甘香既感覺。我每次去高雄都會日日飲，大家記住試下喇。香港淨係得程班長飲得到，不過味道都唔夠高雄飲到既好味。 瑪莉食品 音樂館同高雄市立歷史博物館我都無入過去，有興趣既朋友就自己去喇，跟住講手信店瑪莉食品。其實手信鋪又無乜得好介紹既，話明係食品當然係買嘢食架啦，睇相吧。 買完手信，行埋呢條五福四路。五福四路係一條主要既大街，連接高雄橋，可以通往國賓大飯店。 從五福四路望向國賓大飯店： 駁二藝術特區 + 勞工博物館 其實沿大勇路向海邊一直行，大家就會經過上面呢個駁二藝術特區同勞工博物館。呢度唔係太大，我又唔係一個藝術既人，所以我無停留到，甚至唔記得影相（係我錯！我抵打！），過左駁二，再向海邊行，就可以去到以前碼頭連鐵路總站既遺址，依家已經變左藝術區，大家可以去影下相，踩下路軌，望下海‧‧‧‧‧‧咁囉。 下星期見！ 圖：由作者提供，地圖及街景地圖取材自谷歌地圖  

投票已截止，多謝支持