特首選戰開始埋身肉搏,林鄭月娥、曾俊華同胡國興已經入閘成為特首候選人,唯一可惜係葉劉淑儀又再「斯人獨憔悴」,佢已經好大方咁宣布放棄。民主思路搶先要食頭啖湯,將在星期日開論壇,請晒三個候選人,仲話明有電視同網上直播,等更多市民了解三個人的政綱同施政理念。
不過,召集人湯家驊就吃悶棍好唔開心,事關被黃媒捧到上天的鬍鬚曾要「休養生息」話唔到,得林鄭同胡官兩個打單打。湯律師就話,感到詫異同不安!
唔通怕得罪黃民泛民?
咁奇怪?唔嚟就算啦!又點解會不安呢?原來湯律師都幾睇好鬍鬚曾,佢話,驚萬一有朝一日鬍鬚曾當選,會唔會又好似最近梁振英政府咁只係一味在網上放料,公眾想問又唔得,繼續用這種令人難以接受的溝通方式,所以感到不安。即係怕鬍鬚曾他日做宅佬特首,一味靠電腦來同大家講嘢。
咁會唔會太遲通知呢?阿湯話,十日前已經同四個參選人講咗,話民主思路在星期日會搞論壇,仲一直好緊張咁保持聯絡,又點會遲通知呢!
曾俊華就冇解釋點解唔嚟。老宣就話,唯一解釋係一直都係和稀泥嘅鬍鬚曾怕出醜。 其實,出得嚟選就預咗要面對群眾,正如阿湯所講,呢個係候選人嘅基本責任。唔好又話老宣陰謀論,大家諗深一層,鬍鬚曾會唔會怕得罪背後支持佢嗰班黃民?抑或怕提名佢嘅泛民唔高興?又或者係覺得民主思路又唔係好有影響力的政團,仲係走溫和中間路線,所以唔怕得罪你咪唔出席囉!
政治其實都係計數啫,鬍鬚曾做咗財爺咁耐,數口一定好精,不過老宣最怕佢今次又好似以前啲預算案咁又計錯數!
圖:無綫新聞截圖
投票已截止,多謝支持