美國前總統特朗普取得共和黨內總統提名的成數愈來愈高，當然，最終是否一如多數調查所料，會是現任總統和特朗普之爭？政治一日也嫌長，未到最後一刻都有變數。拜登的年紀大、記憶力差，加上經常跌倒，都成為佢競選的障礙，儘管最近佢體檢，醫生話佢冇問題，適合繼續當總統，美國人民恐怕未必完全相信！

至於特朗普，因為「一身都是罪」，官司多籮籮，債多就話不愁，官司多卻是太擾人。之不過，特朗普見慣大場面，一生人同官司糾結無數，亦視等閒，始終官司惡纏、罰款天文數字並沒有令他有打退堂鼓之意，反而愈戰愈勇。

呢，美國聯邦最高法院上月28日同意聽取特朗普提出擔任總統期間，享有豁免權的主張，今年4月底開庭審理，最遲6月底或7月初有裁決。這對特朗普相當有利，因為假如喺11月大選前未有最終判決，而特朗普當選總統後，佢可以運用總統特赦權等方法，令自己免遭起訴。筆者看到不少內地嘅評論，都指出特朗普正在回來，切不可以輕視他！

特朗普有打不死精神，憑藉這種意志，令佢創造許多奇跡。俄羅斯總統普京即使被拜登用粗話「問候」，都話情願拜登勝，皆因拜登政策較易「估」，而特朗普則較「難以預測」。

其實，特朗普是否如此善於「打亂章」？睇來又未必。特朗普嘅過人之處，係表面上他愛口噏無謂，但佢眼光獨到，睇嘢夠遠視。

拜登對華嘅打壓，其實係特朗普開始先嘅。可以睇到，特朗普一邊嗌「美國優先」，一邊狂隊中國，反映佢真切認識到中國嘅厲害。

再睇拜登，政策一時一樣，又話打壓中國TikTok，佢個競選團隊又要登陸TikTok，雙重標準同埋冇水準表露無遺。咁驚TikTok危害美國國家安全，咁你老拜又用？玩呀？咁你禁定唔禁先？大家以為特朗普「打亂章」，可能拜登先係「打亂章」、亂晒龍嗰個呀！

特朗普對中國的認識，斷估比拜登高明得多，亦都持續得多！而若佢真係勝利「回朝」，對中國嘅打壓，一定會比佢上一個任期變本加厲。當然，笑話亦一定會比上一個任期多得多！大家可以買定花生等睇特朗普出醜啦！

原圖：Donald Trump Facebook影片截圖

https://www.facebook.com/DonaldTrump/videos/1365224757530404/

文章純屬作者個人意見，並不代表本報立場