俄烏戰事已打咗20個月，形勢對烏克蘭的確不妙，波蘭、法國都表示不再提供武器。之不過，烏克蘭總統憑其三吋不爛之舌，還是有本事令拜登應允供烏射程遠達300公里嘅陸軍戰術導彈系統ATACMS，若然，呢款將係西方至今援烏射程最遠嘅炮火，可攜單一彈頭或集束彈，最高飛行時速達3700公里，係最後飛行階段以高速下降難以攔截。

專家指，ATACMS具全天候能力，特別適合很多時氣象環境都不利空中攻擊嘅烏克蘭地區使用；專家就指難靠此大幅改寫戰局，因其非靈丹妙藥，佢仍需以裝甲戰鬥車、坦克、軍機等組成至少10個旅，即約5萬至10萬人，並同時把他們投入戰場！試問烏克蘭如何有咁多人力物力？當然，如果美國真係供應每支成本約85萬美元嘅ATACMS，烏軍相信又可再玩一會，之不過，長貧難顧，美國供應得幾多吖！

美國係新一輪財政預算，當中包括對烏克蘭提供240億美元嘅額外軍援。咪忘記美國國債天文數字，粗略估計每位美國公民背負約9.7萬美元嘅債務。喂！大哥，有冇顧及美國人民嘅感受？仲要無底深淵咁去援烏？更何況烏克蘭根本係扶不起的阿斗，因為部分共和黨人對烏軍嘅反攻行動和貪腐問題有所疑慮，擔心撥款未必用得其所！

正如有論者指出，隨着援烏成本不斷增加，且看不到盡頭，歐洲對烏克蘭嘅支持，難以一直堅定而無條件。呢，歐盟本月中宣布不再延長對烏克蘭糧食嘅進口禁令後，烏克蘭3個鄰國波蘭、斯洛伐克和匈牙利均表示，為保護本國農民利益，將繼續執行禁令，波蘭及匈牙利兩國還對其他烏克蘭農產品實施額外禁令。波蘭總統杜達甚至形容烏克蘭猶如溺水者，「非常危險，因為佢可以把你拖到深水處，害死救援人員！」又如斯若伐克本月底將舉行大選，於民調中暫領先嘅反對派領袖菲喬揚言，若佢勝出上台，將改變現行政策，「一粒子彈也不會給烏克蘭」！可見，烏克蘭已成神枱貓屎，神憎鬼厭！

澤連斯基除咗賣慘求軍援，仍不忘化身「正義」之神，佢係聯合國大會嘅發言，指俄羅斯正在把全世界推向終極戰爭，烏克蘭盡力確保係俄羅斯侵略行動後，再冇人敢攻擊其他國家；講到自己咁偉大卻面不紅氣不喘，可見佢亦有過人之處，就係面皮夠厚！澤連斯基不忘重提烏方嘅10點和談條件，再度邀請全球領袖參與結束這場戰爭嘅和平峰會，指呢個係史上首次有機會根據受攻擊國家提出嘅條件來結束侵略。

澤氏嘅發言，其實都係炒冷飯。對俄羅斯具影響力嘅國家如中國、印度都冇加入責難行列，立場明顯倒向莫斯科嘅伊朗總統萊希於發言時，指摘美國係俄烏衝突中煽風點火，長遠目的係削弱歐洲國家。事實正是如此，援助烏克蘭係無底黑洞，不但美國已「力不從心」，歐洲國家自顧不暇，對戲子總統一味伸手點會冇怨言吖！澤連斯基若然明白「止蝕」嘅道理，好快啲謀求止戰求和有個下台階，否則必將輸到四腳朝天好難睇！

原圖：新華社

文章純屬作者個人意見，並不代表本報立場