渣哥團隊隨時集體唔撈？黃店「大渣哥茶記」（渣哥）今日喺社交平台發帖，話想向大股東「毛記葵涌」買番股份，但呻對方獅子開大口，接受唔到個價。渣哥仲話，如果再拖落去，渣哥團隊可能會集體辭職添！

2018年，「渣哥一九九六」被毛記葵涌附屬公司Most Company A Limited Corporation以250萬元入股49%，另外51%則由創立人前港姐譚小環、其丈夫蔡強榮，以及其他人士共同持有。據渣哥帖文中說，早喺約兩年前，「毛記葵涌已經沒有任何代表參與渣哥及大渣哥之管理及營運」；而今年二月初，渣哥管理團隊就「向毛記葵涌管理層正式提出終止合作，要求以2018年當時入股（只計算實際資產及負債）之同樣條件之下，以現時實際市值購回毛記葵涌持有之49%股份。」

不過在商業市場，唔係你想買，人哋就一定要賣畀你，渣哥話接受唔到毛記葵涌的開價。帖文寫，「這個價錢我哋真係無能為力，亦真的接受不了，更難於接受嘅係渣哥希望購回自己渣哥大渣哥嘅股份，竟然被要求以倍數計嘅價錢（而當日賣出係只計實際資產及負債）。」。渣哥喺帖文最後講到「縱使萬般不捨及面對鵲巢鳩佔嘅殘酷現實」，但都可能隨時集體劈炮，話咁樣做係「向財雄勢大嘅上市集團作出抗議控訴嘅唯一方法」喎！

帖文底下，網民就此事紛紛講吓意見。其中有網民就串渣哥係「傾唔掂數，想情緒勒索」，都講得幾啱！在商言商，人哋要計算公司利益都好正常，渣哥咁樣賣慘好似唔多好喎！

原圖：大渣哥茶記facebook

https://www.facebook.com/JarGor1996/photos/a.625529580858420/951337011611007

https://www.facebook.com/JarGor1996/posts/pfbid0PYhYfLo9tbhaWxsGAem9oRsG1r7YwxNJYPVMuy3huqEPU6HdGfgsbu8D3NoLroDSl