香港政府日前（27日）宣布本年度授勳名單，運動界亦有多人名列其中！而喺香港運動界一直有輝煌成就嘅單車隊亦得到四個頒授殊榮，其中單車隊總教練沈金康更獲得「銀紫荊星章」！

沈金康1994年隻身從上海嚟到香港，喺香港28年間，協助港隊誕生過「亞洲車神」黃金寶、「牛下女車神」李慧詩等多位世錦賽冠軍人馬，仲培養出張敬樂、張敬煒、蔡其皓、郭灝霆、陳振興、黃蘊瑤等國際賽單車手。沈金康喺嘅多位愛徒喺各大賽事屢創佳績，令香港近年能夠躋身亞洲單車界嘅領先位置，並且先後產生咗多個世界冠軍。香港單車隊共獲得20多個世錦賽、世界杯金牌，亦有20多個亞運會獎牌，成績相當彪炳！

沈金康表示，當年佢嚟香港，喺冇裝備、冇辦公室、冇經費，甚至連一名可以自由支配訓練時間嘅專業運動員都冇嘅情況下執教。單車道更係生滿雜草，還被人當作停車場用。「我手上只有一個打氣筒，香港單車聯會冇屬於自己嘅單車，連運動員都需要自費買車。」可見當年殖民地政府對運動員的支援係非常之少！而當年公開招攬運動員，亦沒咩人參加，就只得黃金寶一個！但睇到黃金寶之後嘅成就，相信大家都冇懷疑佢嘅教導能力！

回歸後，香港單車運動喺祖國嘅支持下，開始打造咗現代化嘅單車館，而報名參加訓練嘅單車愛好者亦紛紛擁至。多年來，香港單車運動員得到內地政府大力支持，先有今日嘅成就！總教練沈金康當然亦功不可沒。

沈金康得知自己獲銀紫荊星章後，亦好謙虛咁話，培育運動員喺國際賽事為港爭光，係每位教練應盡嘅責任。比賽成績嘅獲得，主要係靠運動員嘅努力，付出常人難以忍受嘅代價；同時亦更加激勵教練團隊，一齊奮鬥爭取佳績。

「我深切感受到呢個銀紫荊星章係屬於喺第一線嘅教練團隊、按摩師、機械師、科研人員、香港單車總會、香港體育學院嘅同事，同埋關心香港體育嘅所有香港人。亦都屬於願意培育孩子參與單車運動、支持孩子參加單車運動嘅各位家長。」沈金康將功勞歸功於大家，實在非常謙厚。

現年69歲嘅沈金康，坦然永不言休。相信香港單車隊有一個咁敬業樂業嘅總教練，實在係我哋嘅光榮！感謝你對港隊嘅付出！

原圖：星島日報、文匯報

https://std.stheadline.com/realtime/article/1569802

https://std.stheadline.com/realtime/article/899365

https://www.wenweipo.com/a/202108/08/AP610f6d8ce4b08d3407d2f616.html