掛國旗要收錢，大家係咪覺得匪夷所思？舊年為咗慶祝國慶，有批愛國市民向路政署申請喺粉錦公路一帶嘅燈柱掛國旗，路政署竟索價接近15萬嘅高額費用。市民雖不解，但為咗慶祝國慶，就畀咗呢筆錢。近日，呢件事被專欄作家屈穎妍撰文踢爆，議員同埋一群資深傳媒人都忍唔住去信政府提出質疑。路政署火速跪低，表示會跟進申請豁免收費一事，審批豁免嘅程序亦就嚟完成，會盡快安排退款畀相關團體。

該團體當時獲路政署批准掛喺該處懸掛1,214面旗，由9月20日掛到10月9日，為期20日。路政署開出畀佢哋嘅帳單總數係147,670元，帳單列明當中每面旗每日收6元，再加約2,000元申請費。

期後，兩位立法會議員陳仲尼及李鎮強致函路政署署長，查詢事情真偽；並詢問如屬實，是按照哪條法例而執行？此外，「香港資深傳媒人員聯誼會」亦就此事，向特首李家超發出投訴信。

路政署其後回覆，表示佢哋係按照現時政府收回成本嘅收費原則辦事。因此向申請人收番路燈維修承建商喺旗幟懸掛期間進行巡查工作嘅費用，根據既定標準，申請人須就每宗申請繳交1,990元嘅行政費用，而每面旗每日嘅收費則屬巡查費。署方當時確實係依法辦事，但當佢哋收到議員來函後，已決定就事件酌情豁免，並表示會盡快安排退款事宜。

民間自發掛國旗慶國慶需唔需要收錢，暫且不論。議員對此提出質疑確有道理，不過路政署亦係按法例做事，咁唔通係法例上出現咗漏洞？我哋再深入思考一下，點解市民要畀咁多錢掛國旗慶祝？呢啲唔係政府應該做嘅咩？到底政府喺呢方面做得夠唔夠？歡迎大家留言講下你嘅意見！

原圖：星島日報

https://std.stheadline.com/realtime/article/1615337