一直與香港人成長嘅TVB，亦為呢個重要時刻推出《回歸光影頌》電視劇系列，祝賀香港回歸25周年！由今個星期一（4日）起，TVB會先後播放五集單元劇集《究竟天有幾高》、《母親的乒乓球》、《我的驕傲》、《神奇的燈泡》、《曙光》，以及15集嘅重頭劇《回歸》。回歸劇系列由TVB五位資深電視監製創作，動員新舊派演員，一齊講好香港故事，展望更好將來。

其中單元劇《我的驕傲》嘅監製文偉鴻話，為令觀眾感受更深，會呈現香港過去25年嚟經歷過嘅高低起跌，包括沙士、傳遞奧運聖火以及回歸典禮盛況場面。令文監製最印象深刻嘅係，唐詩詠透過窗口，遙距向患沙士嘅老公陳山聰送上鼓勵一幕，兩人演得好感人，連佢都忍唔住流淚。

而由陳維冠監製嘅《神奇的燈泡》，故事構思嚟自香港年輕小市民如何透過自己努力，爭取實現夢想嘅故事，由周嘉洛及江嘉敏傾力演繹。

而負責監製單元劇《曙光》同延續劇《回歸》嘅林志華表示，何廣沛、陳曉華會由《曙光》貫穿演到《回歸》，分別飾演年輕版嘅郭晉安及陳煒。故事講述年輕嘅廚師放棄移民，留港發展，白手興家打理餐館，排除萬難嘅奮鬥故事，絕對可以勾起好多香港人嘅寶貴回憶。

透過影像，令香港人更切身感受回歸25年以來嘅變遷，希望香港人會珍惜呢個地方，更加愛護香港呢個城市；同埋最緊要嘅係，希望可以令香港人更加團結！

原圖：TVB

https://tvbanywherena.com/cantonese/series/2459-Communion

https://tvbanywherena.com/cantonese/series/2456-MyPride

https://tvbanywherena.com/cantonese/series/2458-SilverLining