美國的槍擊案，嚴格來說，已經不算是甚麼「新聞」。只不過槍擊案，尤其校園槍擊，幾乎每年都發生幾起，而且一鑊甘過一鑊！童子操刀，其傷實多，更何況以步槍掃射？有乜辦法唔死得人死？要血氣方剛嘅年青人戒之在鬥，之不過，槍械又那麼易得到，這有可能嗎？今次美國嘅「德州屠殺」，再引來討論咗多時而無功嘅「禁槍」廢話！

朋友說，其實2022年還未到一半，美國已發生咗202宗大規模槍撃事件。截至5月15日，美國喺5月份已發生33宗大規模槍撃案。今趟嘅德州大屠殺，遇害的多是兒童，特別令人心碎！朋友說，如果這樣的悲劇還不能甦醒人心，美國就冇得救了！

要落實槍管天方夜譚

看來，美國係冇得救嘅居多，歷年來的之所以發生如此多嘅槍撃事件，皆因槍枝已然泛濫成災，買枝槍同買棵菜分別不大！呢，美國有所謂H.R.8法案，指嘅係對購槍者進行背景調查，睇吓佢哋有冇犯罪紀錄或精神問題等，藉此衡量及判定買槍者是否有資格合法擁有槍枝。表面睇嚟好似有文有路，之不過，係人都知法案存有漏洞，因存着買家可以利用網購或者經常舉辦嘅槍展，避過背景調查而購得心頭好！

眾所皆知，要在美國落實槍管係天方夜譚，皆因反對嘅勢力太大，除咗美國全國步槍協會，支持人人有權擁有槍枝，佢哋嘅理論係：一旦遇上兇徒來犯，只有擁有槍才可制止血案。問題係槍撃案嘅悲劇，多來自性格或精神有缺陷嘅人士！

最近，美國槍枝製造商Wheel Tactical特為青少年生產一款名為AR-15嘅兒童用步槍，殺傷威力卻同成年用嘅一樣咁驚人！其宣傳標語強調呢款步槍可以像爸媽的槍一樣操作，並在槍枝上畫上一個戴奶嘴嘅骷髏頭以吸引兒童！各位，今趟德州慘劇，兇手用的正是AR-15步槍！

總統最重要學懂哀悼

朋友說：生產呢款步槍嘅生產商，雖然係網上發聲表思念和祈禱，卻不忘為推銷槍械賣廣告，也就難怪美國不少知名專欄作家對美國禁槍不存希望！有評論員總結：和病毒共存，和槍枝共存，和死神共存，美國還可以教我們甚麼？妙哉斯言！

今年至5月30日，美國共有456名兒童（11歲以下）和1886名青少年（12歲至17歲）遭到槍擊，相信係全球之冠。

呢，朋友的臉書也說得好：做美國總統，老也不要緊，最重要是學懂哀悼和下半旗，事關一年閒閒地要做幾十次，總之一臉莊嚴，做得好好睇睇，國民教育悲傷之後，明天太陽照樣升起，關人隱事。不正是這樣嗎？早前老拜登不是下令白宮及公共建築下半旗致哀嗎？

明天太陽又照樣升起！美國式民主萬歲！

原圖：Joe Biden Facebook、Pixabay

https://www.facebook.com/photo/?fbid=108973711707132&set=a.108973675040469

https://pixabay.com/vectors/tombstones-cross-graveyard-cemetery-151263/