自從前政務司司長李家超宣布參加將於5月8日舉行嘅香港特首選舉，唔少媒體，特別係外媒同台媒，都大字標題一再強調所謂「武官治港」，用意係乜，相信大家都心知肚明。

李家超1977年加入警隊任職見習督察，喺警隊平步青雲，最終晉至警務處副處長，2012年被委派到保安局出任副局長，2017年坐正做局長，2021年更成為首名警隊出身嘅政務司司長。擁有如此豐富經歷，如果想僅僅用「武官」二字就概括李家超嘅出身，未免過於兒戲同偏頗喇！

香港普遍有重「文」輕「武」嘅風氣，雖然紀律部隊都係一份非常有意義嘅職業，但相信你聽得最多家長講嘅，一定係希望仔女做醫生律師銀行家。嗰啲開口埋口講「武官治港」嘅人，用心昭然若揭，佢哋正正係睇中香港人呢個特性，刻意用「武官」去矮化警隊出身嘅李家超嘅地位。

總比為官避事來得好

但李家超都唔係省油嘅燈，政務司長發言人曾公開李家超學歷，指佢會考4A高考1A，曾獲香港大學工程學系取錄，後來於警隊任職期間更取得有關公共政策及管理嘅碩士學位，如此學術成績，已經係最好嘅證明，就算係「武官」，亦可以係文武雙全！

當然，就算畀「文官」治港咁又點？回首過去數年嘅香港政治、經濟、社會、民生狀況，又有邊個敢講「文官」、「武官」對治港好壞有絕對關係？再者，香港有完善而且行之有效嘅政治體系，行政、立法同司法三權各司其職，互相配合並制衡，就算新任特首只係無謀匹夫，只要係有決心有幹勁，敢去做該做嘅事，亦總比為官避事來得好。

只要下一屆特首係愛國愛港之士，有決心立法《基本法》23條杜絕國安漏洞，有膽量去推行任何正確嘅政策，做到嘢，香港人就會支持，理得出面啲人點講「文官」定「武官」？

原圖：大公報

http://www.takungpao.com.hk/231106/2021/0826/624609.html