特首林鄭早前跌斷手，有評論者指香港自去年封關至今近兩年，仍未能與內地恢復通關，皆因連個「健康碼」都搞唔掂！

無獨有偶，同文亦有曾財安指林鄭連任嘅機會微乎其微，皆因佢施政缺乏實效，尤其係土地房屋方面，由上台至今完全冇解決「住屋難」嘅問題，同阿爺所說的「五個善於」標準背道而馳！嗱，不妨重溫一下五個「善於」嘅標準講乜：

一係善於喺實踐中全面準確貫徹一國兩制方針，做立場堅定嘅愛國者；

二係善於破解香港發展面臨嘅各種矛盾和問題，做擔當作為嘅愛國者；

三係善於為民眾辦實事，做為民愛民嘅愛國者；

四係善於團結方方面面嘅力量，做有感召力嘅愛國者；

五係善於履職盡責，做有責任心嘅愛國者。

真正「為人民服務」，不易也。

以上五個「善於標準」，「愛國者」缺一不可。做得問責高官，冇人會咁蠢否認自己唔愛國！筆者倒特別看重第三及第五項，皆因兩者係要為民辦實事，「為人民服務」並非單靠把口，誠如阿爺所強調的：謀事要實、創業要實、做人要實。

一個「實」字，就是說「為政貴在行」，要講得出做得到！

北部都會區幾時起好？

林鄭臨收工，任內最後一份施政報告提出「北部都會區」，犀利咯！佔地300平方公里，比全港已建設嘅土地，即約279平方公里仲要大，規模相當於再規劃一個香港。一眾擦鞋高官又瞎起鬨，說甚麼「住大啲、住平啲」並非冇可能。咁巴閉，係香港永久性居民，當北部都會區落成，一人送層實用面積1,000平方公尺洋房畀你又點話吖！

阿哥，依家公屋輪候冊厚過電話簿，平均等5.8年才有望上樓，實際好多基層等咗10年8年望到眼出血都等唔到上樓，而全港有逾20萬劏房戶，居住環境惡劣，政府就話「今日上唔到樓，20年後給你一個五星級的家，高樓望海，春暖花開」。各位，你話呢個政府吹水治港又點會有人信吖？等你再規劃一個香港，少年劏房客恐怕都變成齒搖搖、髪蒼蒼嘅老人家咯！

嗱！香港近年大型基建一再延誤，好似一延再延嘅千億沙中綫終於敲定明年6至7月通車。各位，呢條沙中綫由1998年提出的計劃，到2008年落實興建，再到2012年正式動工，至今足足歷時廿多年。阿哥，一條鐵路都要建逾20年，咁再造一個香港恐怕冇50年都未見到打好地基喇！講嘢！

原圖：星島日報

https://std.stheadline.com/realtime/article/1755695