近年經常聽到「偶像要為粉絲行為買單」呢句說話，原因係有飯圈（粉絲團體）出現極端現象，包括「私生飯」及「腦殘飯」等。而粉絲做出極端行為，其實好容易敗壞其偶像形象，會令大眾對該明星好感大失。姜濤嘅爆紅，係香港娛樂圈近年「神奇」嘅現象，因為佢紅得好突然，好似忽然有一日，網上、甚至身邊人冇啦啦就變咗「姜糖」（姜濤粉絲名稱），但紅唔代表大晒。

飯圈形象有時直接影響偶像形象，飯圈禁忌之一，就係「拉踩引戰」（即係貶低某人來吹捧他人），而姜濤粉絲就好容易出現呢個現象，因為佢哋愛得姜濤好深，喺佢哋眼中，姜濤係最完美，冇人可以同佢比，所以一旦有人拎姜濤同其他人比較，佢哋就會狂讚姜濤，狂踩另一方，只不過，呢個現象係非常唔健康。

粉絲狂揭陳冠希舊帳

早前，網上突然出現一個「投票」，題目係問陳冠希同姜濤邊個靚仔啲，最終當然係「全盛時期」嘅陳冠希多人揀啲，但姜糖為咗「保住」姜濤，不斷揭陳冠希舊帳，係咁重提陳冠希黑歷史，直指兩人冇得比，話陳冠希人品有問題喎，到底邊個靚仔啲？呢啲真係見仁見智，但姜糖呢啲唔審題就護主嘅行為，真係令人震驚。

比完陳冠希，姜濤最近又畀人拎嚟同「歌神」張學友比，比咩？比人氣喎！有網民話姜濤人氣更勝張學友，話張學友已經過咗氣，而姜濤係青春無敵云云，當事人姜濤都疑似因為再被人拎嚟比較而唔開心，甚至深夜發文訴苦，「似乎我只是被比較的標籤」。

每個偶像喺粉絲心中都係最可愛，最迷人嘅，呢個大家都明，但粉絲愛錫自己偶像嘅同時，都要深思吓自己嘅行為會唔會傷害到偶像，否則最終吃虧嘅都係自己個偶像，何苦呢？

原圖：陳冠希微博圖片、大公報、星島日報

http://www.takungpao.com.hk/ent/text/2016/0827/19931.html

https://std.stheadline.com/daily/article/2373183/%E6%97%A5%E5%A0%B1-%E5%A8%9B%E6%A8%82-%E5%A7%9C%E6%BF%A4%E8%87%AA%E7%88%86%E6%9C%89%E8%82%9A%E8%85%A9-%E6%8B%92%E6%80%A7%E6%84%9F%E7%8F%BE%E8%BA%AB%E6%B0%B4%E9%81%8B%E6%9C%83