聽聞警隊國安處最快11月就會設立舉報熱線。你，準備好未？

雖然話家陣我哋有國安處對付港獨份子，但相信國安人員主要都係針對頭目，至於一眾嘍囉，還須香港人同心協力。如果你平時出入見到隔離鄰舍形跡可疑，或者喺網上留意到有人喺社交媒體大放厥詞，又或者係睇到仔女份功課有播獨之嫌，都不妨一盡好市民責任，為國家安全出一分力！

舉個例子，HKG報最近就踢爆香港培正中學問題多多，有家長投訴佢哋嘅通識教材煽動仇視國家、老師鼓吹仇視警隊，甚至連校方都縱容學生派發黑暴文宣、奏唱獨歌。雖然，有部份事件發生喺國安立法之前，但既然至今仍未解決，大家話係咪應該撥個輪去國安處，交畀專業人士處理呢？

其實，除咗我哋良好市民之外，「手足」們都可以mark低個電話以備不時之需。由早前嘅「12瞞逃」落網，到近日鍾翰林食美爹閉門羹，足見港獨勢力已經係強弩之末。諸如羅冠聰、黃台仰呢類「有頭有面」嘅人物，自然早早就搵定後路，依家有晒著落。至於其餘蝦兵蟹將，係咪已經死路一條，只可以束手無策靜待國安處上門拉人？

正所謂「兄弟爬山，互相篤灰」，今日你當「手足」係手足，難保「手足」聽日就出賣你，最慘你畀人篤完灰隨時冇仇報，仲要懵盛盛咁喊住感激「手足」送你車。與其坐以待斃，不如先發制人，戴罪立功！博得他朝做個污點證人，或者仲有得獲判減刑甚至緩刑。就算你唔敢企出嚟，只係匿名舉報都好，起碼都叫除去一個知自己根底嘅隱患，少一分被舉報嘅機會，分分鐘畀你篤入去嗰位「手足」，出冊之日仲要多謝你幫手照顧佢老婆同你個仔！

先篤先著數，後篤冇仇報，康莊大道就指咗出嚟。你，準備好未？

原圖：星島日報圖片

hd.stheadline.com/news/realtime/hk/1516755/即時-港聞-獨家-網傳6‧9遊行再搞佔領-學生動源-圖謀惹關注

hd.stheadline.com/news/realtime/hk/1625007/即時-港聞-網傳60名學生被捕-培正中學發聲明澄清-絕無此事