九龍塘宣道小學一名教師喺校園播獨，畀教育局永久釘牌，今次亦係當局有史以嚟第一次以「專業失德」取消教師資格。遺憾嘅係，事件發生之時，《港區國安法》尚未立法，基於無追溯期嘅原則，香港人暫時無緣見到呢把「尚方寶劍」如何「處決」劣質黃師！

不過大家都唔使擔心，畀梁振英鬧爆「為官避事平生恥」嘅教育局局長楊潤雄，坐咗呢個位咁多年，終於難得強硬一次，斷估都唔會咁快變軟皮蛇。楊局長口窒窒咁講到明，如果日後再有同類涉及港獨等有違《港區國安法》嘅事件，將會同相關執法部門商討處理機制，一旦國安處亮劍，相信到時就唔只係釘牌咁簡單！

可能有人會話，涉及專業失德嘅教師投訴，過去一年至今有超過200宗，依家只不過係釘咗一條友牌咁大把，算得係啲乜？但大家亦要知道，遲到好過冇到，行得慢好過企喺度！無論教育局係主動做又好，受壓力而做都好，總之佢願意踏出第一步，就係零的突破，如今先例已開，相信局方嘅DQ行動，將會陸續有來。

香港人絕對唔會忘記黑暴所帶嚟嘅傷痛，嗰班煽動學生上街、教後生仔「違法達義」嘅教界敗類，沒有一個是無辜的，佢哋一定要為此付出沉痛代價！清算黃師，正是時候！

原圖：HKG報、無綫新聞截圖