香港新冠疫情再爆發，本地確診數日日破百，兼且難見緩和跡象，一眾堅守崗位嘅醫護人員疲於奔命。但在此危急存亡之秋，議會內外一班黃色人形物體，竟然唔係同特區政府通力合作，攜手渡過疫情，反而一日到黑喺度諗點樣借疫情向政府潑污水，甚至喺疫情期間糾眾，大搞所謂「初選」，一心只想撈政治本錢，置市民安危於不顧。

早前有建制中人要求立法會選舉為疫情延期，即時觸動黃營敏感神經，不過佢哋就梗係唔敢話自己係為咗選舉而漠視疫情，只好將矛頭一指，質疑建制派別有用心，因為選情嚴峻先想推遲選舉咁話。22名反對派立法會議員昨日更危言聳聽，聯署指政府若押後選舉無異於竊取政權、顛覆國家，好彩港府夠硬淨，未受反對派讒言左右，最終宣布延後選舉！

好老實講，家陣議會內建制派佔多數，反對派梗係唔樂意見到選舉延期，但喺度提一提大家，立法會議員職責之一就係為民請命，反對派亦經常將呢一點擺喺口邊，但當遇到對自己不利嘅事時，何解佢哋就會將政治利益凌駕於市民性命？

反對派既自詡民意代表，為對抗疫情而延選立會又如何？佢哋只需要做好本份，未來一段時間內喺防疫工作上展現實績，自然係「35+」可期，但如今大疫當前，黃色政客滿腦子卻只有「選票」沒有「選民」，無論以前講嘅說話有幾好聽，原來都只係笑話一場！

講到尾，呢班人只係想食住「黑暴」、「攬炒」個勢上位，但自《港區國安法》上馬後黑暴息微，加之黃到出汁嘅區議會搞到一鑊粥，已盡顯黃色政客庸碌無能，如今為政治利益更不顧疫情只顧選情，黃友目光短淺、急功近利嘅通病，香港市民可謂一覽無遺。時間拖得愈耐，香港醒覺嘅人愈多，黃色陣營嘅勝算愈細，難怪佢哋唔願意延後選舉，因為怕輸！

原圖：無綫新聞截圖