周融日前的博客指出黑暴陰魂不散，香港險境重重，確實道出不少港人嘅心聲，佢文末稱，國家已經開始計劃在疫情慢下來後如何恢復經濟，香港看來肯定有一段日子仍被政治問題拖累，大家將來能夠由低處反彈，首先要保的就是立法會由建制控制及支持政府！

問題係「打鐡仍需自身硬」

冇錯！問題係「打鐡仍需自身硬」，特區政府係處理一些關鍵問題時，就是表現不濟，拖拖拉拉，議而不決，議而不行，遂使反對派有機可乘，區議會選舉大勝後，近日又磨刀霍霍，大言炎炎又要奪取來緊嘅立法會過半議席云云。反對派之所以口氣如食咗幾擔蒜頭，好明顯睇到政府處理黑暴風波手法唔夠硬淨，又冇魄力！

嗱！反修例風波發生至今九個月，一個令人感到震驚的事實是，公僕知法犯法充當暴徒，人數竟逾四十名，分佈政府多個部門。近六成被捕公務員為紀律部隊人員，其中消防員佔十一人最多，可見消防員淪為暴徒大本營，一個紀律部隊搞到好似冇掩雞籠，在上的恐難辭管理不善之責吧？

「零容忍、絕對不會姑息」

究竟吃飯砸鍋的公僕暴徒，潛伏了多少無間道？由於不少被捕後獲釋嘅人士，未必會通知其所屬部門，是以公務員造反人士，點只四十多個吖！公務員事務局局長羅智光有必要嚴肅跟進，唔好淨係廢噏「零容忍、絕對不會姑息」！事實是，公僕視《公務員守則》如放屁，連最基本嘅「政治中立」原則都做唔到，更遑論對行政長官和政府忠誠；現時公務員最大問題就係「言行不一」兼「吃裏扒外」。舉個例啊，早前有公務員遮蓋職員證嘅個人資料和相片後，竟在網上發表聯署反政府；政府咁都忍到，當冇事發生！道行之高，令人佩服！

又如剛過去嘅公院醫護發動罷工威脅港府封關，一個新公務員工會美其名作出聲援，實際又係煽動公務員造反罷工，據說該工會主席不久前仲升職添！造反公僕不但沒有被革職查辦，仲升官發財！當真是「革命無罪，造反有理」！可見政府所謂「嚴肅跟進」，根本兒戲過小朋友玩泥沙，政府管治之無能，於此可見一斑。

公家電台「食碗面反碗底」

再者，政府另一個令人詬病嘅係，對「反骨仔」港台包庇縱容！有建制派議員批評港台好多節目「無營養」，也就難怪經常收到投訴，尤其《頭條新聞》嘅「驚方訊息」，一再抹黑警方，渲染仇警資訊，居心叵測。香港電台作為公營廣播機構，一年狂燒公帑卻從不履行公家電台宣傳政府政策應有職責，反而「食碗面反碗底」，一味同政府對着幹！政府若然一味扮鴕鳥埋首沙堆，不將港台角色重新定位，用十億養惡犬亂吠鬧自己，甚至咬自家心口，笨成咁，豈不貽笑天下？

正如有人提醒，唔好忘記，去年區議會選舉建制派已經輸趴街，來緊九月立法會選舉，正是江暗雨欲來，反對派焚林而獵，為奪管治權已無所不用其極，若然建制派仍然相信「上天有好生之德」，加上政府不藉機整頓港台，任由佢唱衰抹黑，則九月愁風起，黃葉提早飛，建制派選情堪憂！

「為官避事平生恥」之譏

筆者希望政府要有作為，伏魔降妖，從來沒有坐定定喺度，乜都唔使做，啲妖魔就會乖乖投降！伏魔捉妖，作法捉鬼，點都要起個壇吧？肅清內鬼，整頓港台，當務之急，再拖拉下去，一個二個，難逃「為官避事平生恥」之譏！特區政府嘅問責高官，薪酬個個高過歐美元首，唔該咪咁閃縮、窩囊好唔好？

原圖：星島日報

https://std.stheadline.com/instant/articles/detail/1221934/%E5%8D%B3%E6%99%82-%E9%A6%99%E6%B8%AF-%E6%B8%AF%E5%8F%B0%E5%B7%A5%E6%9C%83%E4%BF%83%E5%81%9C%E6%AD%A2%E5%B9%B2%E9%A0%90-%E9%A1%A7%E5%95%8F%E5%A7%94%E5%93%A1%E6%9C%83-%E6%9C%89%E8%B2%AC%E4%BB%BB%E6%8F%90%E6%84%8F%E8%A6%8B