立法會財委會日前討論二〇一九至二〇年度公務員薪酬調整，一向仇警嘅反對派議員阿趦阿趄，一時話要以委員會名義傳召警務處代表出席會議作證和提供證據；一時話要將警察加薪建議抽起分開處理，要言之，就係要阻止警察加人工。

呢！警察在反修例風暴中，六個月來面對黑衣暴徒嘅汽油彈、飛磚射箭，捧着飯盒在路邊啃，有防暴警連續工作三十六小時，攰到在商場地上稍作休息。依家萬多警察按僱傭合約申領九點五億過時補水，竟惹來坐在冷氣間、一係拉布、一係言不及義嘅反對派「尊貴」議員眼紅，話咁大筆逾時工作津貼，要着警務處處長先上來交代再傾喎！

有反對派議員甚至串嘴，話咁大筆補水如果用來興建老人院仲正。而實情係，你班咁嘅廢柴議員，如果拎你哋啲薪津來扶貧，仲正喇！

議員公帑每月36萬元

幸好有論者叫麥國華嘅評論員見義勇為，佢就話啦，警察面對十倍嘅暴民堵路，汽油彈和磚頭横飛。在地鐵站、商舖放火亂砸、肆意欺壓善良，不拘捕暴徒才是警察失職，失職才應不給人工！

睇吓班反對派議員幾時咁關心民生，財委會積壓咁多民生項目，尤其一大堆基建工程等佢哋批，佢哋卻一味拉布，搞到啲建築工人嗌晒救命！呢班廢柴議員未盡自己天職，每月高薪逾十萬，其他津貼、酬酢等加加埋埋，每名議員嘅公帑每月平均約三十六萬元，四年任期公帑埋單找數，每人超過一千七百萬元。講真，反對派議員又為香港做咗乜嘢？值呢個價錢咩？

有個視頻仲見到在清理道路嘅警察同郭家騏議員爭論，一名警察就話：「我依家守護緊香港，我唔知你做緊乜？」壯哉！呢位男子漢！

論者就指出，啲反對派議員每月耗費納稅人三十六萬元，足以多聘請十五位警察，少咗呢批「唔知做緊乜」嘅議員，省下嘅錢足夠讓警隊多請幾百名警員，有益有建設得多！旨哉斯言！

廢柴議員「吃飯砸鍋」

講真，呢班反對派議員就職時，為咗份筍工，就死死氣地宣誓効忠中華人民共和國和香港特別行政區，可是，像鄭松泰不是也和一些公務員一擔擔「吃飯砸鍋」、籠裏雞作反嗎？佢曾在立法會侮辱國旗和區旗，結果罪成都係罰款五千元咁大把！至於一些反對派議員，甚至到台灣、美國唱衰香港、推動港獨，試問成何體統？呢啲咁嘅議員一味破壞一國兩制，試問佢哋有乜操守可言？佢哋搞亂香港又憑乜做「尊貴」議員享高薪厚酬啊？

支持警察加薪、超時補水！

追究廢柴議員「吃飯砸鍋」，霸住茅廁不拉矢！選民們，唔該帶眼識人，亦都咪咁反智，來年慎用手中一票，把一眾廢柴議員掃出議會，否則香港只會繼續沉淪！

原圖：星島日報

https://std.stheadline.com/instant/articles/detail/1149449/%E5%8D%B3%E6%99%82-%E9%A6%99%E6%B8%AF-%E4%BF%AE%E4%BE%8B%E9%A2%A8%E6%B3%A2-%E5%A4%9A%E5%8D%80%E7%BA%8C%E7%99%BC%E8%B5%B7-%E5%92%8C%E4%BD%A0Lunch-%E9%98%B2%E6%9A%B4%E8%AD%A6%E9%95%B7%E6%B2%99%E7%81%A3%E8%88%89%E8%97%8D%E6%97%97%E4%B8%AD%E7%92%B0%E6%8B%981%E7%94%B7

https://std.stheadline.com/daily/article/detail/2075957/%E6%97%A5%E5%A0%B1-%E6%B8%AF%E8%81%9E-%E8%B2%A1%E6%9C%83%E6%96%B0%E5%B9%B4%E5%BA%A6%E9%A6%96%E6%9C%83%E8%AD%B0-%E6%B3%9B%E6%B0%91%E6%8B%89%E5%B8%83%E4%B8%89%E5%8F%A5%E5%8D%8A%E9%90%98