香港外國記者會（FCC）今日搭台畀壹傳媒老闆黎智英講嘢，黎智英自然把握機會自吹自擂。提到近期城中最受關注的修訂《逃犯條例》，黎智英梗係唔放過機會，「表現激動」（《蘋果日報》語），大罵「中國法制垃圾」，又話修例影響比23條更深遠，猛咁呼籲人上街。而當FCC問起前特首梁振英狙擊《蘋果》時，黎竟厚顏話多謝CY以「非常有趣」的方式吸引市民注意《蘋果》，所以「現在有300萬會員」喎。

李柱銘、陳日君等老友賞臉出席，黎智英在半個主場的FCC開講，鬧中國都鬧得盡興啲。當然，在黎智英深黃色的眼鏡下，中國就是好衰，好垃圾，佢本人向來對此都不諱言。黎智英不會（願）見到中國進步，自然就會把中國近年法制的改革通通掃埋牆角當冇。

仇視中國 無視進步

講到《蘋果》會員訂閱人數，黎智英不知是扮唔記得定係唔敢提，竟然無視「安心事件」為《蘋果》帶來多少訂閱量。藝人許志安與黃心穎在車上的所為，被司機侵犯私隱偷錄。猶記得當日不少網民表示，本來沒有訂閱《蘋果》，但為了看「安心片」而訂閱。有傳《蘋果》高價購入有關影片，若然屬實，絕對是助長侵犯私隱的惡行。

黎智英如此風涼，不正正是得了便宜又賣乖麼？看到黎智英侮辱中國，大家會唔會贈佢幾句？

原圖：HKG報