時事

釘王案後黨慶晚宴
白鴿籌旗銀碼狂跌

2019.03.20 11:30 時事

民主黨黨慶籌旗好失威。近日民主黨好受注目，除了黨慶之外，更因為該黨「釘王」林子健報假案罪成判監，連帶成班當日有份出場撐釘王的黨內大人物通通被恥笑。唔知呢件事係咪令盟友們都睇唔過眼，所以好似唔多畀面出席白鴿黨慶晚宴，去年有嚟嘅眾志「河童」黃之鋒、會去耶魯讀書嘅羅冠聰等都冇騷佢，據《文匯報》報道，場內亦有好些吉枱，或者坐唔滿人。結果，民主黨籌旗數目狂跌，得返420萬，不可謂不樣衰也。

黨逢醜事花生多老鴿乳鴿又不和

回想民主黨過去一年，可謂立立亂到加零一：許智峯搶手機蝦女人匿埋廁所睇嘅劣行人人有眼見；而林卓廷狙擊CY UGL不成被英國狠狠打面；近日更加肉酸——釘王林子健當日聲稱被「內地強力部門」禁錮虐待SM打釘，結果被判報假案罪成囚5個月，但當日有份同佢一齊出席記招嘅李柱銘、何俊仁、林卓廷唔係扮冇事就係唔敢回應，令民主黨進一步成為全港笑柄。更別說老鴿乳鴿又不和，搞到黨慶籌旗晚會嘅花生特別多了。

在這麼一個大環境下，你估民主黨仲有幾多人信？可能基於這些負面理由，今次民主黨籌旗數目進一步下滑，僅得420萬，遠遜去年的逾500萬，跌幅相當大。只是民主黨還是要點面子的，可能因此一早調低籌旗目標，咁就可以圍上遮醜布，說「比預期好」也。